धार्मिक वन हस्तान्तरण कार्यक्रम सम्पन्न
पाल्पा जिल्लाको तिनाउ गाउँपालिका वडा नं. २ नुवाकोटमा रहेको भैरव कामना धार्मिक वन विहिवार एक कार्यक्रमका बीच सो धार्मिक वनको कार्यसमितिलाई हस्तान्तरण गरिएको छ ।
कार्यक्रमका प्रमुख अतिथि जिल्ला वन कार्यालय,पाल्पाका जिल्ला वन अधिकृत दधिलाल कंडेलले उक्त धार्मिक वनको प्रमाण पत्र र कार्ययोजना धार्मिक वनका अध्यक्ष रामेश्वर कसजूलाई प्रदान गरी हस्तान्तरण भएको जानकारी गराइएको थियो । साथै उनले सो धार्मिक वनमा विभिन्न प्रजातिका विरुवाहरु रोपण,ट्रेकिङ रुट,मचान,वायोडाइभर्सिटी पार्क र भ्यू टावर निर्माण गर्न सकिने तर त्यसका लागि जिल्ला वन कार्यालयको अग्रिम स्वीकृति लिनु पर्नेमा जोड दिए ।
उक्त कार्यक्रममा सैनामैना नगरपालिकाका मेयर चित्र बहादुर केसीले नुवाकोटको महिमा बढाउनका लागि आफ्नो भूमिका कहाँनेर आवश्यक पर्छ आफूहरु हाजिर हुने बताए । सोही अवसरमा तिनाउ गाउँपालिकाका अध्यक्ष ओम बहादुर घर्तिमगरले तिनाउ गाउँपालिकाको अतिनै महत्वपूर्ण स्थानमा रहेको नुवाकोटको विकासका लागि गाउँपालिकाले विशेष पहल गर्ने र चासो लिएको बताए ।
नुवाकोट विकास समितिका अध्यक्ष माधव नेपालले नुवाकोटको पर्यापर्यटन विकासमा धार्मिक वनको महत्व हुने र त्यसका लागि जिल्ला वन कार्यालय,पाल्पाको प्राविधिक सहयोग र आफ्नो समितिले सक्दो योगदान गर्ने बताए ।
सोही कार्यक्रममा दोभान एकीकृत पर्यटन विकास समितिका संयोजक दल बहादुर गुरुङले धार्मिक वनको वहुप्रयोग गर्न सके नुवाकोटले नयाँ आयाम ल्याउन सक्ने बताए । साथै उनले यस क्षेत्रको पर्यटन विकासका लागि आफूहरु हातेमालो गरी अघि बढ्ने बताए ।
कार्यक्रममा पूर्व सांसद् देवेन्द्र घिमिरे,समाजसेवी हीरा प्रसाद श्रेष्ठ,होटल तथा रेष्टूरेण्ट व्यवासायी महासंघ,रुपन्देहीका अध्यक्ष समुन्द्र जीसी,नुवाकोट विकास समितिका उपाध्यक्ष अनुपमान सैंजू लगायतले धार्मिक वनका सन्दर्भमा बोलेका थिए ।
कार्यक्रमको सञ्चालन धार्मिक वनका सचिव दिनेश श्रेष्ठ र अध्यक्ष रामेश्वर कसजूको अध्यक्षतामा सम्पन्न भएको थियो ।
प्रतिक्रिया