बुटवलका सडक बालबालिका तथा असहायहरुको उद्धार कार्य सुरु

बुटवलका सडकपेटीमा कष्टकर जीवनयापन गरिरहेका बालबालिका तथा असहायहरुको उद्धार कार्य सुरु गरिएको छ । मानव सेवा आश्रम बुटवलले सुख्खानगरमा एउटा घर भाडामा लिएर त्यस्ता बालबालिकाहरुको उद्धार थालेको हो ।

शनिबार बुटवलका विभिन्न स्थानबाट ५ बालबालिकाको उद्धार गरिएको आश्रमका केन्द्रीय अध्यक्ष रामजी अधिकारीले जानकारी दिए ।आश्रमका अनुसार, प्रदेश ५ का ४० सडक बालबालिकालाई आश्रममा आश्रय दिएर राखिनेछ ।

उद्धार कार्यको शुभारम्भका अवसरमा बुटवल उपमहानगरपालिकाका प्रमुख शिवराज सवेदीले बुटवललाई मानवताको शहर बनाउने र सबै खालका हिंसा अन्त्यको नगर बनाउन नगरपालिकाले यस्ता संस्थालाई सहयोग गर्ने बताए।

उनले अब बुटबल उपमहानगरका सडकपेटीमा कष्टकर जीवनयापन गर्ने मानिस नरहने बताए ।

प्रदेश ५ को सामाजिक विकास मन्त्रालयले पनि यो अभियानलाई सफल बनाउन बजेट बिनियोजन गरेको छ । मन्त्रालयका प्रबाक्ता मित्रमणि खनालले गत बर्ष पनि बजेट बिनियोज गरेको र अहिले पनि मानबआश्रकोलागी बजेट बिनियोजन गरेको बताएका छन ।