पाल्पा तिनाउको सिद्धबाबा मन्दिरमा भर्तृहरिको विषयमा प्रवचन हुने

मुक्तकार एवम् तपस्वी भर्तृहरिका बारेमा सोमवार तिनाउ गाउँपालिकाको दोभानमा पर्ने सिद्धबाबा मन्दिर परिसरमा परिचर्चा कार्यक्रम हुने भएको छ ।
उक्त कार्यक्रममा वक्ताका रुपमा रहेका प्रा.हुमकान्त पाण्डेयले भर्तृहरिको जीवनीपरक परिचय, सहप्राध्यापक ऋषिराम भुसालले भर्तृहरिका त्रिसतकका बारेमा विश्लेषण र डा.मुरारि पराजुलीले मुक्तक परम्परा विषयमा प्रवचन दिने सिद्धबाबा मन्दिर विकास समितिका अध्यक्ष दल बहादुर गुरुङले बताए ।
किंवदन्ति अनुसार सिद्धबाबा क्षेत्रमा भर्तृहरिले तपस्या गरी सिद्धि प्राप्त गरेका हुँदा यस क्षेत्रलाई सिद्धबाबा भनिएको हो । भर्तृहरिले सिद्धबाबा क्षेत्र नजिकै पर्ने कुहिरेभीरमा बसेर त्रिसतक(वैराग्य,नीति तथा श्रृङ्गारिक) लेखेको भनिन्छ ।
उनी भर्तृहरिका विषयमा सिद्धबाबा मन्दिरले आफ्नै खर्चमा पहिलो पटक यस्तो प्रवचन कार्यक्रम गर्न थालेको समितिका सचिव अमर प्रधानले बताए । कार्यक्रममा सिद्धबाबा मन्दिर विकास समितिका पदाधिकारीहरु,स्थानीय सरकारका जनप्रनिधिहरु,सिद्धबाबा धामका पदाधिकारीहरु,स्थानीय सामाजिक संघसंस्थाका प्रतिनिधिहरु र राजनीतिक पार्टीतका अगुवाहरुको सहभागिता रहने सचिव प्रधानले बताएका छन् ।
भर्तृहरिकै कारण नाम कमाएको यस सिद्धबाबा क्षेत्रलाई धार्मिक पर्यटनको हब बनाउन थालिएको सिद्धबाबा मन्दिर विकास समितिका कोषाध्यक्ष एवम् तिनाउ गाउँपालिका वडा नं.३ का वडाध्यक्ष प्रेम पाण्डेयले बताए ।