साहित्यलाई सरकारले साथ र सहयोग दिनुपर्छ
दल बहादुर गुरुङ
मुक्तक मण्डप अर्धवार्षिक साहित्यिक पत्रिकाको रुपन्देही मणिग्राममा एक कार्यक्रम बीच प्रदेशका उद्योग,पर्यटन ,वन तथा वातावरण मन्त्री माननीय लिला गिरीले सोमवार लोकार्पण गरेका छन् ।
प्रमुख अतिथिका रुपमा रहेका उनले साहित्यलाई सरकारले सक्दो साथ र सहयोग गर्नुपर्ने औल्याउँदै साहित्य अनुशासित र दिशानिर्देश गर्ने खालको हुनु पर्नेमा जोड दिए । उनले पुराना दिनहरु सम्झिदै आफूहरुले गणतन्त्र ल्याउनका लागि साहित्य र राजनीतिलाई साथ लिएको र साहित्यले समाजलाई बदल्न सक्ने तागत हुने भएको हुँदा साहित्यकारहरुले संघीयता खत्तम छ भन्नेहरुलाई चोटिलो जवाफ दिनुपर्ने बताए ।
उनले भने करविना राज्य सञ्चालन हुन सक्दैन । सरकारले नागरिकबाट लिएको करलाई विकास निर्माण र सुशासनको मार्गमा खर्चिने बताउँदै पारदर्शिता भन्दा अपारदर्शी तरिकाले हुने खर्चका सन्दर्भमा बहस हुनु पर्ने बताए ।
सोही अवसरमा तिलोत्तमा नगरपालिकाका मेयर बासुदेव घिमिरेले आफूहरुले गठन गरेको तिलोत्तमा साहित्य कला संगीत प्रतिष्ठान मार्फत तिलोत्तमा क्षेत्रमा राष्ट्रियस्तरको साहित्यिक गोष्ठी र मूर्तिकला सम्बन्धी राष्ट्रिय भेला गर्ने र नमूना दीपावली भैली कार्यक्रमको आयोजना समेत गर्न थालिएको जानकारी गराउँदै साहित्य,कला र संगीतविनाको नगरको कल्पना गर्न नसकिने उनको तर्क थियो ।
सो पत्रिकाको बारेमा साहित्यकारहरु प्राज्ञ बूँद राना,बालकृष्ण भट्टराई,वनमाली निराकार,हुमकान्त पाण्डेय,ऋषिराम भुसाल,रुद्र ज्ञवाली,विजय सागर,प्राडा हिरण्य ज्ञवाली,अजम्बरध्वज खाती लगायतले आआफ्ना विचार प्रकट गरेका थिए । मुक्तकको विकासमा सो पत्रिकाले निरन्तरता पाउनु पर्नेमा सबैको जोड रहेको थियो ।
पत्रिकाका प्रधान सम्पादक डा.मुरारि पराजुलीको अध्यक्षतामा सम्पन्न उक्त कार्यक्रमको सञ्चालन लीलाधर प्रतीकले गरेका थिए ।
प्रतिक्रिया