मदन पुरस्कार गुठीले २०७४ सालको मदन पुरस्कार योगमाया उपन्यासकी लेखिका निलम कार्की निहारिकालाई प्रदान गरेको थियो । सो पुरस्कार उनले यही असोज २५ गते काठमाण्डौंमा पाएकी थिइन् ।
नगद दुई लाख रुपैयाँसहित ताम्रपत्रद्वारा पुरस्कृत निलमले ऐतिहासिक एवम् शाहसिक व्यक्तित्व योगमायाको योगदानलाई अनुसन्धान तथा खोजी गरी योगमाया उपन्यास तयारी गरेकी थिइन् ।
योगमायाले वि.सं.१९९८ असार २२ गते ६८ जना आफ्ना साथीहरुसंग जलसमाधि लिएकी थिइन् । उनको ध्येय समाजलाई सकारात्मक गोरेटोमा डोराउनका लागि समाजमा रहेका विकृति र विसंगतिहरुलाई हटाउनु पर्छ भन्ने थियो तर राणाकालीन व्यवस्थाले उनको त्यो दृष्टिकोण अनि कदमलाई उचित ठानेन । सोही विषयलाई केन्द्रविन्दू बनाएर तयार पारिएको उपन्यास हो योगमाया ।
उक्त उपन्यासले धूमिल हुँदै गएको योगमायाको योगदानलाई उत्खनन् गरेको छ । सबैका बीचमा प्रस्तुत गरेको छ । जीवन र जगतलाई बुझाएको छ । योगमायाको परिचय र पहिचान दिल्याएको छ । सोही उपन्यासकी लेखिका निलमलाई आइतवार बुटवलमा बधाईज्ञापन गरिएको छ ।
कार्यक्रममा प्रवल जनसेवा श्रीपदकबाट विभूषित न्यू होराइजन साहित्य परिषद्का संरक्षक लोकनाथ उपाध्याय एवम् नेशलन बक्स अफिस म्यूजिक अवार्डबाट सम्मानित मनिराम पन्थ मनिषलाई समेत बधाईज्ञापन गरिएको थियो ।
कार्यक्रममा मदन पुरस्कारद्वारा पुरस्कृत निलम कार्कीले मदन पुरस्कार प्राप्त भएपछिका खुसीहरु, योगमायाको योगदान र हामीले उनलाई सम्झिनु पर्ने कारण एवम् आवश्यकतामाथि प्रकाश पारेकी थिइन् ।
कार्यक्रममा कविवर रामचन्द्र भट्टराई,गिरि श्रीस,धु्रवराज पन्थी मिराज,मीन राना, दल बहादुर गुरुङ,रामचन्द्र श्रेष्ठ,हरि प्रसाद पौडेलले निलम कार्कीलाई बधाईज्ञापन गर्दै साहित्यिक यात्राको निरन्तरताको समेत कामना गरेका थिए ।
कार्यक्रम न्यू होराइजन साहित्य परिषद्,बुटवल कला साहित्य,संस्कृति प्रतिष्ठान,साहित्य संगम,बुटवल र पाठमञ्चले संयुक्त रुपमा गरेका थिए ।
प्रतिक्रिया