महर्षी वैदिक फाउण्डेशनका सञ्चालक सदस्य भरतराज पौडेलले मंगलवार सिद्धबाबा मन्दिर विकास समिति,दोभानका अध्यक्ष दल बहादुर गुरुङ र पूर्वअध्यक्ष महेन्द्र पाण्डेयसंग भेटघाट गरी सिद्धबाबा मन्दिरमा गुरुकूल सञ्चालन सम्बन्धी छलफल गरेका छन् ।
उनले धार्मिक आस्थाको केन्द्र सिद्धबाबा मन्दिरमा वैदिक सनातन धर्मको रक्षा र संस्कृत भाषाको उन्नयन गर्नका लागि गुरुकूल शिक्षा आवश्यक रहेको औल्याउँदै संसारका धेरै देशहरुमा अहिले गीता,रामायण,पुराणहरुको पढाइ हुँदै आएको बताए । सिद्धबाबा क्षेत्रमा ध्यान र ज्ञान केन्द्र बनाउन आफ्नो फाउण्डेशनले सक्दो नैतिक सहयोग गर्नमा कुनै कञ्जुस्याइँ नगर्ने बताए ।
सो फाउण्डेशनले न्यूनतम ३५ जना विद्यार्थी भएमा वार्षिक साढे छ लाख आर्थिक अनुदान समेत दिने भएको हुँदा सिद्धबाबा मन्दिरमा आर्थिक समस्या नपर्ने जानकारी गराए । साथै त्यहाँ पढ्ने बटुकहरुले दैनिक स्वस्ती वाचन,पाठपरायण,आरति समेत गर्ने भएको हुँदा सिद्धबाबा मन्दिरको गरिमा र महिमा बढाउन सहज हुने उनको तर्क थियो ।
मन्दिर विकास समितिका पूर्व अध्यक्ष महेन्द्र पाण्डेयले गुरुकूल शिक्षा सुआत् गर्न सकेमा यस क्षेत्रको धार्मिक महिमा बढ्ने भएकाले त्यसप्रति मन्दिर विकास समितिलाई छिट्टै सकारात्मक कदम चाल्न आफूले पनि सुझाउने बताए । त्यसका लागि मन्दिरले स्थानीय सरकार,शिक्षा कार्यालय र सम्बन्धित सबैसंग बसेर छिटो कदम चाल्नु पर्ने र सक्दो छिटो गुरुकूल शिक्षा लागू भएको आफूले हेर्न चाहेको समेत पाण्डेयले बताए ।
प्रतिक्रिया