ईलाका प्रहरी कार्यालय,बुटवलले आज मंगलवार शान्ति सुरक्षा,चाडपर्वमा घट्न सक्ने घटना र सुरक्षाका निम्ति अपनाइएका रणनीतिक योजना सम्बन्धमा पत्रकार भेटघाट कार्यक्रम सम्पन्न गरेको छ । उक्त कार्यक्रममा सुरक्षा सम्बन्धी जानकारी गराउँदै प्रहरी उपरीक्षक डिल बहादुर मल्लले चाडपर्वका बेला घटन सक्ने आपराधिक घटनालाई रोक्न र तासजुवा खेल्नेहरुलाई सार्वजनिक अपराध अन्तर्गत मुद्दा चलाउन आफूहरु कस्सिएर लागेको बताए ।
हरेक दिन साँझदेखि रातिसम्म राजगमार्गमा साधा एवम् बर्दीधारी हतियारसहितका प्रहरीहरु सुरक्षाका निम्ति खटाइएको र तासजुवाका अखडाहरु खोजी खोजी जुवाडेहरुलाई पक्राउ गरी कार्वाही गर्न प्रहरीहरु तम्तयार रहेको उनले बताए । जुवाडेहरुलाई मुद्दा चलाउने आफ्नो रहरलाई कसैले छेक्न नसक्ने उनको जिकिर थियो ।
पत्रकारहरुले सोधेको एक प्रश्नमा प्रहरी उपरीक्षक मल्लले भने हामीले पक्रेका कुनै पनि अभियुक्तहरुलाई माथिको आदेशका भरमा छाड्ने छैनौं । कानूनको पूर्णपालना गर्नेछौं । नागरिकको सुरक्षा गर्नका लागि हामी अहोरात्र खटिएका छौं यो हाम्रो नैतिक जिम्मेवारीमात्र होइन कामप्रतिको वफादारिता हो ।
कार्यक्रममा नेपाल पत्रकार महासंघ,रुपन्देहीका कार्यवाहक अध्यक्ष दिनेश पाण्डेय,टिआर शर्मा,भरत केसी लगायतले शान्ति सुरक्षा र प्रहरीको सुरक्षा योजना सम्बन्धी चासो राखेका थिए ।
प्रतिक्रिया