दोभान र झुम्सा खोला मिलेर तिनाउ नदी बन्छ । दोभान र झुम्सा खोला बढेर आउँदा २०३८ सालको असोज १३ गतेका दिन दोभान र बुटल क्षेत्रमा धेरै धनजनको क्षति भएको थियो । दोभान क्षेत्रबाटमात्र २९ जना स्थानीय बासिन्दाहरुले ज्यान गुमाउनु परेको कहालीलाग्दो घटना छ । यसबाट दर्जनौंका संख्यामा परिवार घरवारविहिन हुन पुगेका थिए ।
सोही असोज १३ गते बाढीका कारण ज्यान गुमाएका मृतात्माको चीर शान्तिको कामना गर्दै आज सिद्धबाबा क्षेत्रमा दीप प्रज्जवलन गरिएको छ । नेपाल विज्ञान तथा प्रविधि प्रतिष्ठानका सदस्य एवम् पहिरो विशेषज्ञ प्राज्ञ डाक्टर रञ्जन दाहाल र सिद्धबाबा मन्दिर विकास समितिका मूल गुरु नाराण प्रसाद घिमिरेले धार्मिक मन्त्र वाचन गरी दीप प्रज्ज्वलन गरिएको थियो । २९ जनाको सम्झनामा २९ थान दीप मन्दिरका अध्यक्ष दल बहादुर गुरुङ,सचिव अमर प्रधान र कोषाध्यक्ष लगायत मन्दिर आएका भक्तजनहरुले समेत बालेका थिए ।
२०३८ साल असोज १३ गतेका पीडितहरु अमर प्रधान र दल बहादुर गुरुङले आफ्ना भोगाईका साथै फेरि पनि तिनाउले पुरानो अवस्था दोहोराउन सक्ने भएकोले बेलैमा सर्तक रहन अपील समेत गरेका थिए । तिनाउ गाउँपालिका वडा नं.३ का वडाध्यक्ष प्रेम पाण्डेयले मृतात्माको चीर शान्तिका लागि गरिएको यो पूण्यकर्मले निरन्तरता पाओस भनी त्यस्तो कहाली लाग्दो दिन कसैले भोग्न नपरोस बताए ।
कार्यक्रममा प्राज्ञ डाक्टर रञ्जन दाहालले कुहिरे भीरको पहिरोे र यसको समयमै चित व्यवस्थापन गरिएन भने तिनाउ नदी थुनिएर बुटवलको अवस्था भयावह हुने सक्ने भएकोले सबैको ध्यान यतै हुनु पर्नेमा जोड दिए । असोज १३ को कालो दिन कसैगरी फेरि दोहोरिन नदिन बेलैमा सरकार,स्थानीय बासिन्दाहरु सचेत र सजग हुनु पर्नेमा जोड दिए ।
प्रतिक्रिया