नेकपा एमालेका अध्यक्ष केपी शर्मा ओलीले माधव नेपालको भ्रममा परेर झुक्किएकाहरूलाई पार्टीमा फर्कन आह्वान गरेका छन् । काठमाडौंको प्रज्ञा भवनमा आयोजित कार्यकर्ता भेलालाई सम्बोधन गर्दै अध्यक्ष ओलीले सो आह्वान गरेका हुन् ।
‘माधव नेपालले अलमल्याएका, भ्रममा पारेका र झुक्याएका साथीहरू पार्टीमा फर्कनुस् । कार्यकर्ता फर्कनुस् । झुकिएका साथीहरू फर्किनुस्’, ओलीले भने।
तर, माधव नेपाललाई भने पार्टी फर्कन नपर्ने उनले बताए । नेपालको साथ छाडेर ओलीतिर गएका नेताहरूलाई इंकित गर्दै उनले अब माधव नेपाललाई पार्टीमा फर्कनका लागि आग्रह नगर्न समेत भने । तर, अलमलिएका कार्यकर्तालाई भने अझै पनि पार्टीमा फर्कन ओलीको आह्वान छ ।
साथै, उनले माधव नेपालले पार्टीमा आगो लगाएर खरानी धसेर तीर्थयात्रामा हिँडेको टिप्पणी गरे । उनले भनेका छन्, ‘माधव नेपाल घरमा आगो लगाएर खरानी धसेर तीर्थयात्रामा हिँडेका मान्छेहरूलाई म केही भन्दिनँ । घरमा आगो लगाएर खरानी धसेर हिँडे, म केही भन्दिनँ । तर, माधव नेपालले उहाँको व्यक्तिगत महत्वकांक्षा, स्वार्थ, इगो र अहंकार, ईर्ष्याभाव कुण्ठाबाट ग्रसित भएर जुन खेलवाड गर्नुभयो बहुतै डरलाग्दो कुरा हो ।’
उनले माधव नेपालले कार्यकर्ताको खेलवाड गर्न खोजेको आरोप लगाए । उनले भने, ‘आफ्ना स्वार्थका लागि दुनियाँको जिन्दगीसँग खेलवाड गर्ने ? दुनियाँको कार्यकर्ताको राजनीतिक भविष्यसँग खेलवाड गर्ने ? उहाँ त पार्टी प्रमुख भएर धेरै वर्ष चलाउनुभयो । प्रधानमन्त्री भइसक्नुभयो । उहाँलाई माथि जाने अरू ठाउँ छैन । उहाँले इगोका लागि जे पनि गर्नुहुन्छ । तर, अरूको त भविष्य छ नि । अरूका भविष्यसँग खेलवाड गर्ने ?’
प्रतिक्रिया