सामुदायिक वन समन्वय समिति,तिनाउ पाल्पाका वरिष्ठ उपाध्यक्ष हुन् दल बहादुर गुरुङ । उनले सन् २०१८ को डब्लूडब्लूएफ् संरक्षण पुरस्कार प्राप्त गरेका छन् । सो पुरस्कार ५० हजार राशीको थियो । संरक्षणको अभियानमा एक दशक बिताइ सकेका अभियन्ता दल बहादुर गुरुङले वन,वातावरण र जैविक विविधता संरक्षणका निम्ति सो पुरस्कार हात पार्न सफल भएका हुन् ।
सामुदायिक वन समन्वय समितिमा उनी सचिव,महासचिव हुँदै वरिष्ठ उपाध्यक्ष भई निरन्तर संरक्षणको अभियानमा क्रियाशील छन् । उनी आफूले संरक्षण वापत पाएको पुरस्कारलाई अक्षयकोषको रुपमा आफ्ना स्वर्गीय बाबा लाल बहादुर गुरुङ र स्वर्गीय आमा चन्द्र श्री गुरुङको स्मृतिमा लालचन्द्र संरक्षण पुरस्कार को सामुदायिक वन समन्वय समितिको १५ वार्षिक साधारण सभा एवम् सार्वजनिक सुनुवाईको अवसरमा शनिवार घोषणा गरेका छन् ।
तिनाउ गाउँपालिकामा रहेका ८१ वटा सामुदायिक वन उपभोक्ता समूहहरु मध्ये वन,वातावरण र जैविक विविधता संरक्षणको अभियानमा उत्तम कार्य गर्ने उपभोक्ता समूहलाई सो पुरस्कार प्रदान गरिने छ । पुरस्कारका लागि कार्यविधि बनाई वितरण गरिने समितिका अध्यक्ष अमर प्रधानले बताए ।
पुरस्कारका संस्थापक दल बहादुर गुरुङले सो पुरस्कारको राशी बढ्दै जाने र संरक्षण सम्बन्धी कार्य गर्ने उपभोक्ता समूहलाई यस पुररस्कारले हौसला र उत्साह थप्ने बताए । साथै उनले सो पुरस्कार वितरणका लागि स्वतन्त्र छनौट समिति गठन गर्ने र समन्वय समितिले अनुमोदन गर्ने बताए ।
प्रतिक्रिया