१३ साउन २०७८, बुधवार
मोरङको सुन्दरहरैँचा नगरपालिका–१० का खगेन्द्र थापाको शिव पञ्चायन ज्वेलर्समा लुटपाट गर्न खोज्ने समूह आधुनिक हतियारसहित पक्राउ परेको छ । समूहका पाँचजनालाई प्रहरीले पक्राउ गरेको हो ।
समूहका सदस्य घटनामा प्रयोग गरिएको अत्याधुनिक हतियारसहित पक्राउ परेको प्रहरीले जनाएको छ । उक्त समूहले यही साउन १ गते दिउँसो शिव पञ्चायन ज्वेलर्स लुटपाट गर्ने प्रयास गरेको थियो । तर, स्थानीयको प्रतिकारपछि उनीहरु हतियार देखाउँदै फरार भएका थिए ।
समूहका सदस्यहरु अत्याधुनिक एवं स्वचालित हतियार एसएमजी (मेसिनगन), एउटा कटुवा पेस्तोल र एउटा चाइनिज पेस्तोल तथा ७० राउन्डजति विभिन्न हतियारका गोलीसहित पक्राउ परेको बताइएको छ ।
इलाका प्रहरी कार्यालय बेलबारीका प्रहरी निरीक्षक सरोज खनाल नेतृत्वको टोलीले खोजी तीव्र पारेको थियो । प्रदेश नम्बर–१ का प्रहरी प्रमुख डीआईजी अरुणकुमार बिसीले जिल्ला प्रहरी कार्यालय मोरङका डीएसपी मञ्जील मुकारुङको नेतृत्वमा इन्सपेक्टर खनालसहितको विशेष टोली परिचालन गरेका थिए । प्रहरीले घटनाबारे थप अनुसन्धान गरिरहेको जनाएको छ ।
प्रतिक्रिया