वर्तमान राजनीतिमा समकालीन साहित्यको भूमिका विषयक् अन्तक्र्रियात्मक कार्यक्रम सोमवार बुटवलमा सम्पन्न भयो । कार्यक्रममा मुख्य वक्ताका रुपमा रहेका राजनीतिज्ञ घनश्याम भुसालले बुटवलको साहित्य पुनर्जागृत हुँदै गएको बताउँदै सेवा र वस्तु उत्पादन नगर्ने थलोले बौद्धिक प्रवक्ता जनाउन धेरै मिहिनेत गर्नुपर्ने बताए ।
साथै उनले यहाँ असाधारण संकल्प जन्मिने र मर्ने गरेको कारण साहित्यलाई दीगो रुपमा अघि लैजानका निम्ति साहित्यकारहरुले अर्थराजनीतिलाई नजिकबाट नियाल्नु पर्ने सुझाए । उनले भने–सामन्तबादको अन्त्य भईसकेपनि त्यसको अवशेषहरु अझ्ै जिउँदो रहेको छ । साहित्यकारहरुका कलम सिर्जनाको नयाँ गोरेटोमा हिड्न नसक्नुको मूल कारण साहित्यले कुन बाटो अपनाउने भन्ने विषयमा राजनीतिले दिशानिर्देश गर्न नसक्नु पनि हो । साहित्य र राजनीतिको सम्बन्ध निकटतम रहने भएकाले साहित्यकारहरुले समाजशास्त्रको मनोविज्ञान बुझ्न आवश्यक रहेको सुनाए ।
सोही अन्तक्र्रियात्मक कार्यक्रममा साहित्यकार डाक्टर मुरारि पराजुलीले समयको चेत बुझ्न नसक्नु नै साहित्यकारको कमजोरी रहेको बताए । उनका अनुसार साहित्यले समयको चेत बुझ्न सक्नुपर्छ । अर्थराजनीतिसंग साहित्यले सरोकार राख्ने भएकै हुँदा साहित्यलाई राजनीतिबाट अल्ग्याउन गाहे हुने बताए ।
कार्यक्रममा रुपन्देहीको साहित्यिक गतिविधिका सन्दर्भमा युवाकवि रामचन्द्र श्रेष्ठले प्रकाश पारेका थिए भने कवि मीन राना मगरले शिलोक वाचन गरेका थिए ।
संस्कृतिविद् राजेन्द्रकुमार आचार्य,युवाकवि गिरि श्रीस मगर,कवि चुतर्भुज आत्रेय,रोहन पृथक लगायत तीन दर्जन साहित्यिक व्यक्तित्वहरुको विशेष उपस्थित रहेको सो कार्यक्रमको संयोजन र सञ्चालन दल बहादुर गुरुङले गरेका थिए ।
प्रतिक्रिया