स्थानीय पत्रकार नेपालले गण्डकी प्रदेशको पोखरामा शनिवार संस्थागत तथा सूचनाको हक सम्बन्धी अभिमुखीकरण कार्यक्रम सम्पन्न गरेको छ ।
कार्यक्रममा प्रमुख अतिथिका रुपमा रहेका गण्डकी प्रदेशका उद्योेग,पर्यटन,वन तथा वातावरण मन्त्री माननीय विकास लम्सालले सूचनालाई आफ्नो सरकारले पहिलो प्राथमिकता दिएको बताउँदै सरकारसंग सूचना माग्न पाउनु नागरिकको नैसर्गिक अधिकार रहेको समेत बताए ।
गण्डकी प्रदेशले आफ्नो प्रदेशका आमनागरिकलाई सुखी र समृद्ध बनाउनका निम्ति सोही अनुुसारको योजना तयार पारि कार्यान्वयनको पक्षमा उत्रिएको र त्यसका लागि सर्वसाधरणलाई सूचनाको माध्यमद्वारा सूचित गराउनका लागि पत्रकारहरुलाई समेत अनुरोध गरे ।
कार्यक्रममा सूचनाको हक सम्बन्धी अभिमुखीकरण गर्दै राष्ट्रिय सूचना आयोगका प्रमुख आयुक्त कृष्णहरि बास्कोटाले सूचनाविना कुनै पनि विषयमा निर्णय गर्न असहज र अपरिपक्कव हुने भएको हुँदा सूचनालाई शक्तिका रुपमा ग्रहण गर्न सबैलाई अनुरोध गरे । देशका सातै प्रदेशमा आमनागरिकलाई सूचनाको हक सम्बन्धी सचेतना अभियान सञ्चालन गर्ने आयोगको प्रमुख कर्तब्य समेत रहेको बताए ।
कार्यक्रममा पोखरा महानगरपालिकाका प्रमुख प्रशासकीय अधिकृत शेषनारायण पौडेलले सूचना माग गर्ने आफ्नो नागरिकलाई तोकिएकै मितिमा सूचना प्रदान गरिएको बताए । साथै उनले सूचनालाई कम्प्यूटराइज्ड गर्न नसक्दा कहिलेकाँही समस्या देखा परेको समेत सुनाए ।
सोही कार्यक्रममा गण्डकी प्रदेशमा विगतदेखि स्वास्थ्य,शिक्षा,सरसफाइ,नागरिक शिक्षा,मानव अधिकार एवम् विविधत क्षेत्रमा योगदान पुराउने ११ जना ब्यक्तित्वहरुलाई स्थानीय पत्रकार नेपालले सम्मान गरेको थियो ।
स्थानीय पत्रकार नेपालका केन्द्रीय अध्यक्ष शंकर प्रसाद ज्ञवालीको अध्यक्षतामा सम्पन्न उक्त कार्यक्रममा स्वागत तथा कार्यक्रमको औचित्यतामाथि कोषाध्यक्ष बासुदेव तिमसिना,कार्यक्रमको सञ्चालन सचिव दल बहादुरले सञ्चालन गरेका थिए ।
प्रतिक्रिया