मित्र उराठी गौतमद्वारा लिखित लकडाउनको उपहार नामक कविता संग्रहको शनिवार विहान एक कार्यक्रमका बीच साहित्यकार एवम् संस्कृतिकर्मी झपेन्द्रबहादुर जीसीले श्रीनगर अनलाईन मिडियाको कार्यालयमा विमोचन गरेका छन् ।
प्रमुख अतिथिका रुपमा रहेका जीसीले लकडाउनका बेला सिर्जनशीलताको उपज स्वरुप कविता संग्रह उपहार दिन सकेकोमा कवि गौतमलाई हार्दिक बधाई प्रकट गर्दै आगामी दिनमा समेत साहित्यमा कलम चलाउन अनुरोध गरे । कविता संग्रहमा विराट विषयवस्तुलाई समेटेका गौतमले सरल तरिकामा विचार र भावना पस्कन सफल रहेको बताउँदै प्रमुख अतिथि जीसीले गौतमको कलमले नेपाली साहित्य आकासमा नयाँ आयाम थप्न सक्ने औल्याए ।
उक्त पुस्तकको समीक्षा गर्दै लेखक तथा अध्येयता माधवकुमार पौडेलले मित्र उराठी गौतमको कवितामा लकडाउनको तिक्ततामात्र होइन लकडाउनबाट उन्मुक्तिको खोजी गरेको बताउँदै कवितामा इन्द्रेणी प्राप्त गर्न सकिने बताए । पौडेलले लेख्न र छाप्नका लागि रहर गरेरमात्र सो कवितासंग्रह बजारमा नआएको बताउँदै लकडाउनले दिएका कहरलाई मसिनो तरिकाले विश्लेषण गरी कविताका बान्कीमा संग्रह ल्याउन गौतम सफल रहेको सुनाए ।
सोही पुस्तकको समीक्षा गर्दै लेखक एवम् अधिकारकर्मी मीनाक्षी न्यौपानेले कवितामा लैङ्गीक समानता,न्यायको वकालत,विश्वव्यापीकरण र लकडाउनका तीतामीठा अनुभवहरुलाई लिपीबद्ध गरिएको बताउँदै पुस्तक पठनीय र संग्रहणीय रहेको उल्लेख गरिन् ।
उक्त पुस्तक विमोचन कार्यक्रममा कविता संग्रहका श्रष्टा मित्र उराठी गौतमले रचना गर्भ प्रस्तुत गर्दै आफ्ना कविता संग्रहका बारेमा समीक्षकहरुले मिहिन तरिकाले समीक्षा गरिदिएको र आफूले पनि साहित्य रचना गर्न सक्छु भन्ने आँट बढाई दिएको अनुभव सुनाए ।
कार्यक्रममा प्रलेस,नेपालका केन्द्रीय सदस्य मीनबहादुर रानाले स्वागत गरेका थिए । श्रीनगर अनलाईन मिडिया प्रालि,बुटवलको आयोजनामा सम्पन्न उक्त कार्यक्रमको सञ्चालन सोही अनलाईनका सम्पादक दलबहादुर गुरुङ र अध्यक्षता मिडियाका सञ्चालक मनीष पन्थले गरेका थिए ।
कार्यक्रममा लुम्बिनी प्रदेश योजना आयोगका सदस्य डाक्टर विष्णु गौतम,कलाकार प्रदीप गौतम,पुस्तक व्यवसायी माधव गौतमको समेत विशेष उपस्थिति रहेको थियो ।
https://www.facebook.com/watch/?v=348960633031294
प्रतिक्रिया