गुरुङ साहित्यिक मञ्च,नेपाल पोखराको प्रथम वार्षिकोत्सव पोखरामा बुधवार विविध कार्यक्रमका बीच सम्पन्न भयो । कार्यक्रमका प्रमुख अतिथि मुक्तक प्रतिष्ठान नेपालका अध्यक्ष राम काजी कोनेले गुरुङ जातिको भाषा,संस्कृति र साहित्यका निम्ति मञ्चले महत्वपूर्ण योगदान गरेको भन्दै उच्च प्रशंसा गर्दै आगामी दिनमा समेत मञ्चले उल्लेखनीय योगदान पुराउने कुरामा आफू विश्वस्त रहेको बताए ।
विशिष्ट अतिथिका रुपमा संस्कृतिकर्मी चिनकाजी गुरुङ,उपन्यासकार चन्द्र बहादुर गुरुङ,शान्ति तमू,तीर्थ गुरुङ लगायतले मञ्चको पहिलो वार्षिकोत्सवमा सफलता र उन्नतिको शुभकामना समेत प्रकट गरेका छन् ।
साहित्यिक रचना वाचन,आजीवन तथा साधारण सदस्यहरुलाई प्रमाण पत्र वितरण तथा साहित्य र सञ्चारमा योगदान पुराएकाहरुलाई सम्मान समेत गरिएको थियो । कार्यक्रममा गौरी तमू लेखन पुरस्कारका लागि साहित्यकार गौरी तमूले एक लाख ११ हजार एक सय ११ रुपैयाँको अक्षयकोष निर्माण गरेकी छन् ।
मञ्चकी अध्यक्ष गौरी तमूको अध्यक्षतामा सम्पन्न उक्त कार्यक्रमको सञ्चालन संस्थाकी सचिव रोशनी गुरुङ र स्वागत रोशन तमूले गरेका थिए ।
प्रतिक्रिया