प्रदेश नम्बर ५ को पहिलो संसद बैठक सकिएको छ । बैठकले फागुन २ गते सभामुखको निर्वाचन गर्ने निर्णय गरेको छ । संसद सचिवालय रहेको बुटवल उद्योग वाणिज्य संघको हलमा बसेको बैठकले संसदीय कार्यबिधि, सभाध्यक्षको समिति र सभामुख चयनको मिति तोकेको छ ।
प्रदेशसभाका जेष्ठ सदस्य रुपन्देहीका ८० वर्षीय बलदेव शर्मा पोखरेलले पहिलो बैठकमा सभामुखको भूमिका निर्वाह गर्दै प्रदेशसभा आह्वान सम्बन्धी प्रदेश प्रमुख उमाकान्त झाको पत्र पढेर सुनाएका थिए । बैठकले आगामी बैठक सञ्चालनका लागि अन्तरिम कार्यविधि समेत बहुमतले पारित गरेको छ ।
बैठकले सभामुख र उपसभामुख नहुंदा संसद सञ्चालनका लागि ५ सदस्यीय समिती गठन गरेको छ । समितिमा नेकपा एमालेका कमलराज श्रेष्ठ, नेकपा माओवादी केन्द्रका दधिराम शर्मा न्यौपाने, नेपाली कांग्रेसका अष्टभूजा पाठक, संघिय समाजवादी फोरमका सन्तोष पाण्डे र राष्ट्रिय जनमोर्चाका तारा जिसी रहेका छन् ।
आइतबारको बैठकले प्रदेशसभाको अन्तरिम कार्यसञ्चालन कार्यविधि पनि पारित गरेको छ । त्यसपछि प्रदेशसभामा प्रतिनिधित्व गर्ने विभिन्न दलका सांसदहरुले संबोधन गरेका थिए । प्रदेश नं. ५ मा नेकपा एमालेका ४१, माओवादी केन्द्रका २०, नेपाली कांग्रेसका १९, संघीय समाजवादी फोरमका ५, राष्ट्रिय जनता पार्टी र राष्ट्रिय जनमोर्चाका एकएक गरी ८७ जना सांसद रहेका छन् ।
राजपाका तर्फबाट सांसद बनेकी विना पन्तको भने सपथ ग्रहण नै नगरेकाले उपस्थिती रहेन । पांच नं. प्रदेशमा बांके, बर्दिया, दाङ, रुकुम पूर्व, रोल्पा, प्युठान, गुल्मी, अर्घाखांची, पाल्पा, रुपन्देही, कपिलवस्तु र नवलपरासी पूर्व जिल्ला समेटिएको छ । प्रदेशसभामा बैठकलाई आधार मानेर बुटवल र आसपासमा सुरक्षा व्यवस्था कडा पारिएको थियो ।
प्रदेशसभा सचिवालय र आसपासमा नेपाल प्रहरी र बाहिरी घेरामा सशस्त्र प्रहरी परिचालन गरिएको थियो ।
प्रतिक्रिया