तिनाउ गाउँपालिकामा कार्तिक १३ र १४ गते गाउँपालिका स्तरीय अध्यक्ष कप भलिबल रनिङ्गशील्ड प्रतियोगिता सञ्चालन भयो । सो प्रतियोगितामा तिनाउ गाउँपालिकाको वडा नं.५ ले प्रथम स्थान हासिल गरी रनिङ्ग शील्ड,ट्रफी,मेडल,प्रमाण पत्र र नगद प्राप्त गरेको छ ।
दोस्रो हुने तिनाउ गाउँपालिका वडा नं.१ ले ट्रफी,मेडल,प्रमाण पत्र र नगद प्राप्त गरेको छ । प्रतियोगितामा वडा नं.२ ले तृतीय स्थान हासिल गरी ट्रफी,मेडल,प्रमाण पत्र र नगद प्राप्त गरेको छ ।
प्रतियोगितामा प्रमुख अतिथिका रुपमा रहेका प्रतिनिधि सभाका सदस्य माननीय सोम प्रसाद पाण्डेयले स्वस्थ शरीरका लागि खेलकूदको आवश्यकता रहने र स्थानीय रुपमा आयोजना गरिएको भलिबल प्रतियोगिताले युवाहरुमा खेलप्रतिको सकारात्मक धारणाको विकास गरी अघि बढाउन सहज हुने बताए । खेलाडीहरुले राष्ट्रिय तथा अन्तर्राष्ट्रिय प्रतियोगितामा समेत सहभागी भई विजयी हुने अवसर प्राप्त गरुन् भनी शुभकामना समेत प्रकट गरेका थिए ।
कार्यक्रममा प्रदेश सभा सदस्य माननीय वसन्त घर्तिमगरले युवाहरुको खेलप्रतिको उत्साहलाई स्थानीय सरकार,प्रदेश सरकार हुँदै केन्द्रीय सरकारले समेत महत्व दिने बताए ।
सो कार्यक्रममा तिनाउ गाउँपालिकाका अध्यक्ष ओम बहादुर घर्तिमगरले तिनाउका युवाहरुलाई एकीकृत गरी परस्पर सम्बन्ध स्थापना गर्नका लागि अध्यक्ष कप भलिबल रनिङ्ग शील्ड प्रतियोगिता आयोजना गरिएको सुनाए ।
युवा समन्वय समितिका अध्यक्ष प्रेम श्रेष्ठको अध्यक्षता,सचिव गंगा शेरचनको सञ्चालनमा सम्पन्न कार्यक्रममा तिनाउ गाउँपालिकाका ६ वटा वडाका १२ समूहले भाग लिएका थिए ।
प्रतिक्रिया