कांग्रेस नेता बालकृष्ण खाँणको गृहजिल्ला रुपन्देहीका अधिकांश स्थानीय तहमा सभापति शेरबहादुर देउवा प्यानल नेतृत्वमा आएको छ । खाँड पनि देउवा पक्षधर नेता हुन् । नेता भरत शाहको असन्तुष्टिका कारण दुई स्थानीय तहको नेतृत्वमा भने उक्त समूह पराजित भएको छ । रुपन्देहीको एक मात्र उपमहानगरपालिका बुटवल र देवदह नगरबाहेक १४ स्थानीय तहमा देउवा पक्ष नेतृत्वमा आएको हो । तिलोत्तमा नगरपालिकामा देउवा पक्षका हरिलाल पाण्डे झिनो मतले विजयी भएका छन् । १७४ मत ल्याएर पाण्डे विजयी हुँदा रामचन्द्र पौडेल समूहका नारायण न्यौपानेले १ सय ७२ मत प्राप्त गर्दै कडा टक्कर दिए । पाण्डे वर्तमान नगर सभापति हुन् भने न्यौपाने तिलोत्तमा ९ का वडाध्यक्ष हुन् । अन्य सबै पदाधिकारी भने पाण्डे प्यानलकै विजयी भए । तिलोत्तमामा सभापतिका अर्का उम्मेदवार हरि तिवारीले ३० मत प्राप्त गरे ।
सिद्धार्थनगरमा देउवा पक्षकै कोसिस खड्का विजयी भएका छन् । उनले रामचन्द्र पौडेल पक्षका संजीव शर्मा रेग्मीलाई पराजित गरेका छन् । देवदहमा पौडेल समूहका गुणाखर भुर्तेल विजयी भएका छन् । उनले देउवा समूहका झविन्द्र भण्डारीलाई पराजित गरेका छन् । लुम्बिनी सांस्कृतिक नगरपालिकामा मोहम्मद सइद खान निर्वाचित भएका छन् । उनीसहित उनको सिंगो कार्यसमिति निर्विरोध चयन भएको हो । उनी देउवा समूहमा रहेपनि भरत शाहसँग नजिक मानिन्छन् । सैनामैना नगरपालिकाको नगर सभापतिमा रणबहादुर खनाल निर्वाचित भएका छन् । उनले १२६ मत पाएर विजयी हुंदा प्रतिस्पर्धी कृष्णप्रसाद पोखरेलले १०२ मत पाए । खनाल रुपन्देही ५ का संघीय सांसद भरत शाह निकट हुन् भने पोखरेल बालकृष्ण खाँण निकट हुन् ।
दुई स्थानीय तहको नेतृत्वमा पौडेल पक्ष विजयी
बुटवल उपमहानगर सभापतिमा पौडेल पक्षका खेलराज पाण्डेय निर्वाचित भएका छन् । पदाधिकारीमा एकजना सहसचिवबाहेक सबै पदमा पाण्डेय प्यानलका उम्मेदवार विजयी भएका छन् ।
वर्तमान नगर सभापति रहेका पाण्डेयले देउवा समूहकी रिता केसीलाई फराकिलो मतान्तरले पराजित गरेका हुन् । पाण्डेयले ४१२ मत प्राप्त गर्दा केसीले १२४ मत पाइन् ।
उपसभापतिमा ज्योति भण्डारी ४०३ मत र हितमान पुन २ सय ८२ मतसहित विजयी भए ।
केसी प्यानलका नरबहादुर रजालीले २३८ र हरिलाल सुनार १०२ मत पाए । सचिवमा पाण्डेय प्यानलकै गंगा पन्थीले ३०७ मत र छायाँ पोखरेलले २ सय ९४ मत पाएर विजयी भए ।
केसी प्यानलका जय प्रकाश भट्टराईले २३९ र सन्तोष पौडेलले १४८ मत पाए । दुईजना सहसचिवमध्ये पाण्डेय प्यानलका देवलाल अर्गली २९७ र गणेश घिमिरे ३०० मतसहित विजयी भए ।
देवदह नगरपालिकामा पौडल पक्षका गनाखर भुर्तेल सभापतिमा विजयी भएका छन् ।
पाँच स्थानीय तहमा निर्विरोध
रुपन्देहीका १६ मध्ये पाँच स्थानीय तहमा निर्विरोध नेतृत्व चयन भएको छ ।
जिल्ला निर्वाचन अधिकृत भेषराज घिमिरेका अनुसार लुम्बिनी साँस्कृतिक नगरपालिका, ओमसतिया गाउँपालिका, गैडहवा गाउँपालिका, कोटहिमाई गाउँपालिका र मर्चवारी गाउँपालिकामा सर्वसम्मत नेतृत्व चयन भएको हो ।
गैडहवा गाउँपालिकाको सभापतिमा सत्यनारायण पथिक, कोटहीमाई गाउँपालिकाको सभापतिमा अवधराम यादव, मर्चवारी गाउँपालिकाको सभापतिमा जनार्दन यादव र ओमसतिया गाउँपालिकाको सभापतिमा भगवानप्रसाद चौधरीसहित सबै पदाधिकारी र कार्यसमिति सदस्यहरु निर्विरोध निर्वाचित भएका घिमिरेले जानकारी दिए ।
जिल्लाका बुटवल उपमहानगरपालिका तथा सिद्धार्थनगर, तिलोत्तमा र देवदहमा देउवा र पौडेल समूह अलग–अलग प्यानल बनाएर चुनावी प्रतिस्पर्धाका लागि उत्रिएका थिए । केही तटस्थ रहेका नेताहरुलाई दुवै समूहले आफ्नो आफ्नो समूहमा गनेका छन् ।
यस्तो छ निर्वाचितहरुको सूची
बुटवलः खेलराज पाण्डे (पौडेल समूह)
तिलोत्तमा नपाः हरिलाल पाण्डे (देउवा समूह)
सिद्धार्थनगर नपाः कोशिसबहादुर खड्का (देउवा समूह)
सैनामैना नपा: रणबहादुर खनाल (देउवा समूह)
देवदह नपाः गुनाखर भुर्तेल (पौडेल समूह)
लुम्बिनी सांस्कृतिक नगरपालिकाः मोहम्मद सहिद खाँ (भरत शाह)
कन्चन गापाः देवीराम रेग्मी (संयुक्त)
गैडहवा गापाः सत्यनारायण पथिक (देउवा)
कोटहीमाई गापाः अवधराम यादव (पौडेल)
मर्चवारी गापाः जनार्दन यादव (पौडेल)
ओमसतिया गापाः भगवानप्रसाद चौधरी (संयुक्त)
मायादेवी गापाः पदम भण्डारी (देउवा)
रोहिणी गापाः पारसनाथ योगी (देउवा)
सियारी गापाः गोपाल पाण्डे (देउवा)
शुद्धोधन गापाः दामोदर पौड्याल (देउवा)
सम्मरीमाई गापा: रमेश यादव (पौडेल)
प्रतिक्रिया