विश्ववन्य जन्तुकोष,नेपालले आफ्नो संस्थाको रजत जन्यन्तीको अवसरमा डब्लूडब्लूएफ संरक्षण पुरस्कार–२०१८ बाट तिनाउ गाउँपालिका–२,दोभान पाल्पाका संरक्षण अभियन्ता दल बहादुर गुरुङलाई शनिवार जेठ ५ गते काठमाण्डौंको एक होटलमा नेपाल सरकारका वन तथा वातावरण मन्त्री शक्ति बस्नेतको प्रमुख आथित्यतामा प्रहरी महानिरीक्षक सर्वेन्द्र खनालले सो पुरस्कार प्रदान गरेका छन् ।
गुरुङ विगत नौं वर्षदेखि सामुदायिक वन समन्वय समिति,दोभानमा सचिव,महासचिव हुँदै हाल उनी वरिष्ठ उपाध्यक्ष पदमा रहि संरक्षण अभियानमा क्रियाशील छन् ।
सो कोषले जैविक विविधता संरक्षण,वातावरण परिवर्तनमा सचेतना,दीगो विकास,वातावरण शिक्षा,संरक्षणमुखी नीतिगत निर्णय एवम् पैरवी,मिडिया तथा पत्रकारिताका साथै संरक्षणमा युवा शीर्षकमा कार्य गर्नेहरुलाई उक्त संरक्षण पुरस्कार दिन थालेको हो ।
गुरुङले पाल्पाको साविकका दोभान,मस्याम,कचल,कोल्डाँडा,पूर्वी ज्यामिरेमा रहेर वन,वातावरण,जैविक विविधता र चुरे संरक्षणमा महत्वपूर्ण योगदान दिएको हुँदा सो कोषले पुरस्कार प्रदान गरेको हो । उनले वन,वातावरण,जैविक विविधता एवम् चुरे संरक्षण सम्बन्धी सयौं लेख,रचना,सफलताका कथाहरुका साथै संरक्षणमुखी वृत्तचित्र समेत लेखन गरेका छन् ।
उनलाई नगद पचास हजार रुपैयाँका साथ प्रमाण पत्र प्रदान सम्मान गरिएको छ ।
गुरुड यस अघि नै खाती प्रतिष्ठान,बुटवलबाट संरक्षण अभियन्ताको रुपमा सम्मानित भइ सकेका छन् । त्यतिमात्र होइन उनले नूरगंगा साहित्य पुरस्कार,छविलाल साहित्य पुरस्कार,बुटवल साहित्य कला संस्कृति प्रतिष्ठान,बुटवल,सिद्धार्थ साहित्य परिषद् भैरहवा,सिर्जनशील साहित्य समाज,भैरहवा,साहित्य संगम,बुटवल,औद्यागिक ब्यापार मेला,बटवलबाट समेत पुरस्कृत एवम् सम्मानित भई सकेका छन् ।
आस्थाका श्वरहरु,नौं फन्का,चिठ्ठी साहिंलीलाई,हात्ती करायो,नसोध लगायतका पुस्तकहरु प्रकाशनमा छन् । विभिन्न संघसंस्थामा रही सामाजिक गतिविधिमा क्रियाशील गुरुड निवृत्त सरकारी शिक्षक हुन् ।
प्रतिक्रिया